ქალთა ხელშემწყობი პოლიტიკის გაძლიერება ცენტრალურ აზიაში - გენდერისა და კლიმატის ცვლილების პოლიტიკა

ეისითი გლობალმა, GEO Outlook LLC-თან თანამშრომლობით, მოიპოვა აზიის განვითარების ბანკის (ADB) ახალი ტექნიკური მხარდაჭერის პროექტი, რომელიც მიზნად ისახავს გენდერული თანასწორობის გაძლიერებას ყაზახეთის, ყირგიზეთის რესპუბლიკის, ტაჯიკეთისა და თურქმენეთის კლიმატის პოლიტიკაში. პროექტი ხელს შეუწყობს იმ ინსტიტუციური გარემოს გაძლიერებას და პოლიტიკის დოკუმენტების გაუმჯობესებას, რომელიც გავლენას ახდენს ქალთა მედეგობაზე კლიმატის ცვლილების მიმართ, და დაეხმარება სახელმწიფო უწყებებს, გენდერული თანასწორობის საკითხები უფრო სისტემურად ასახონ კლიმატის პოლიტიკაში, პროგრამებსა და სამოქმედო გეგმებში.

აზიის განვითარების ბანკთან, სახელმწიფო უწყებებსა და ეროვნულ დაინტერესებულ მხარეებთან მჭიდრო თანამშრომლობით პროექტი აერთიანებს პოლიტიკის ანალიზს, ინსტიტუციურ გაძლიერებას, შესაძლებლობების განვითარებასა და რეგიონულ ცოდნის გაზიარებას. ეისითი გლობალი შეისწავლის ოთხივე მონაწილე ქვეყანაში არსებულ კლიმატის ცვლილების პოლიტიკას, პროგრამებსა და გეგმებს, შეაფასებს მათ შემუშავებასა და განხორციელებაში არსებულ გენდერულ ხარვეზებს და შეიმუშავებს პრაქტიკულ რეკომენდაციებს გენდერული მგრძნობელობის გასაძლიერებლად. სამუშაოს შედეგად მომზადდება ოთხი ეროვნული შეფასების ანგარიში და ერთი კონსოლიდირებული რეგიონული ანგარიში, სადაც გამოიკვეთება თითოეული ქვეყნის პრიორიტეტები, საერთო გამოწვევები და ქვეყნებს შორის გამოცდილების გაზიარების შესაძლებლობები.

როგორც პროექტის ლიდი, ეისითი გლობალი უზრუნველყოფს პროექტის შედეგობრივ განხორციელებას და მხარს დაუჭერს იმ კლიმატის პოლიტიკის, პროგრამებისა და სამოქმედო გეგმების მომზადებას, გადახედვას, დამტკიცებასა და განხორციელების მხარდაჭერას, რომლებშიც გენდერული თანასწორობის საკითხებია ინტეგრირებული. პროექტი ასევე მოიცავს ეროვნულ კონსულტაციებს, შესაძლებლობების განვითარების ღონისძიებებსა და რეგიონულ სამუშაო შეხვედრას გენდერულად მგრძნობიარე კლიმატის პოლიტიკის საკითხებზე. გარდა ამისა, პროექტი ხელს შეუწყობს გენდერისა და კლიმატის ცვლილების საკითხებზე მომუშავე აქტორების არაფორმალური რეგიონული ქსელის შექმნას, მათ შორის თითოეულ მონაწილე ქვეყანაში ეროვნული ლიდერების გამოვლენასა და გაძლიერებას. 

ერთიანობაში, აღნიშნული აქტივობები ხელს შეუწყობს ცენტრალურ აზიაში უფრო ინკლუზიური, ეფექტიანი და კლიმატის ცვლილების მიმართ მედეგი მმართველობის განვითარებას.