ევროპის რეკონსტრუქციისა და განვითარების ბანკი (EBRD), ACT Global-თან და Ipsos-თან თანამშრომლობით, იწყებს კლიმატის ადაპტაციის კვლევას საქართველოში და უზბეკეთში. 

კვლევის მიზანია შეფასდეს, როგორ რეაგირებენ ბიზნესები ამ ქვეყნებში კლიმატთან დაკავშირებულ რისკებსა და შესაძლებლობებზე. განსაკუთრებული ყურადღება დაეთმობა კომპანიების ადაპტაციის სტრატეგიებსა და საინვესტიციო საჭიროებებს. კვლევა ასევე უზრუნველყოფს მნიშვნელოვანი ინფორმაციის მიღებას იმის შესახებ, რამდენად მზად არის კერძო სექტორი კლიმატის ცვლილებით გამოწვეულ გამოწვევებთან გასამკლავებლად და უფრო მდგრად პრაქტიკაზე გადასასვლელად. 

ACT Global, Ipsos-თან პარტნიორობით, პასუხისმგებელია მონაცემთა შეგროვებაზე საქართველოსა და უზბეკეთში. კვლევის ფარგლებში შეგროვდება ეროვნულ დონეზე წარმომადგენლობითი მონაცემები სხვადასხვა სექტორის კომპანიებიდან, რაც უზრუნველყოფს მტკიცებულებებზე დაფუძნებულ ანალიზს და დაეხმარება EBRD-ს კლიმატის სტრატეგიისა და პოლიტიკის დიალოგის განვითარებაში ორივე ქვეყანაში. 

EBRD-ის ამ ინიციატივის მიზანია ბიზნესებში კლიმატური მოქმედებების ძირითადი დაბრკოლებებისა და მამოძრავებელი ფაქტორების უკეთ გააზრება. მიღებული შედეგები ხელს შეუწყობს მიზნობრივი ინტერვენციების შემუშავებას, რომლებიც დააჩქარებს მწვანე ტრანსფორმაციას და გააძლიერებს კლიმატის ცვლილებისადმი მდგრადობას საქართველოში და უზბეკეთში.