world icon Geo drop down arrow
world icon Geo drop down arrow

ეისითის შვილობილმა კომპანიამ „DiFlex” მილიონ ლარამდე ინვესტიცია მოიზიდა

10.12.2021 2 წუთის საკითხავი
ეისითის შვილობილმა კომპანიამ „DiFlex” მილიონ ლარამდე ინვესტიცია მოიზიდა

პროგრამული უზრუნველყოფის კომპანია „დიფლექსმა“ საქართველოს ჯანდაცვის ჯგუფის (GHG) ინვესტიცია მოიპოვა, რომელმაც ჯამში მილიონ ლარამდე შეადგინა. დიფლექსი დღეიდან საერთაშორისო მასშტაბის ციფრული პროდუქტის განვითარებას იწყებს, 2022 წელს კი, საერთაშორისო ბაზარზე გასვლას გეგმავს.


დიფლექსი ეისითის შვილობილი კომპანიაა, რომელმაც ეისითის მაღალი ექსპერტიზა სატელეფონო კვლევების მიმართულებით კონკრეტულ ციფრულ პროდუქტში გადაიტანა. საერთაშორისო სოფტების გამოყენებამ და კლიენტების მოთხოვნებზე დაკვირვებამ შესაძლებელი გახადა ონლაინ ქოლ-ცენტრის მომსახურების შექმნა, რომელმაც თავის თავში უახლესი ტექნოლოგიები და ინოვაციური მიდგომები გააერთიანა.


დიფლექსი მომხმარებელს სთავაზობს ვირტუალურ ქოლ ცენტრს და საკომუნიკაციო პლატფორმას. პროდუქტი უნიკალურია თავისი არსით და გამოყენებით, ის თავის თავში აერთიანებს ყველა იმ პრიორიტეტს, რომელსაც სხვადასხვა საჭიროებისთვის ცალკეული ტექნოლოგიები უზრუნველყოფენ. თუ კომპანიას არ აქვს შესაბამისი ინფრასტრუქტურა - ოფისები, სერვერები და არ ჰყავს ოპერატორები, მაგრამ სურს ქოლ ცენტრის მოწყობა ან ცხელი ხაზის ამუშავება, შეუძლია ისარგებლოს დიფლექსის მომსახურებით.


„ამჟამად ვართ პროდუქტის განვითარების გუნდის ჩამოყალიბების ეტაპზე. არსებული დროისთვის პროდუქტი ორი ქვეყნის ბაზარზეა მორგებული და შეუფერხებლად მუშაობს, თუმცა გვაქვს ამბიცია გლობალური ბაზარი ავითვისოთ, შესაბამისად, იგეგმება საერთაშორისო რეგულაციების და სტანდარტების გათვალისწინებით პროდუქტის მოდიფიკაცია“, - აღნიშნავს კომპანია „დიფლექსის“ თანადამფუძნებელი და აღმასრულებელი დირექტორი ნინო ხარშილაძე.


დიფლექსი მომავლის პროდუქტია და მისი კონკრეტული პრიორიტეტები აღემატება რიგითი ციფრული პროდუქტის შესაძლებლობებს:


აღნიშნული უპირატესობების გათვალისწინებით ყველაზე მთავარი, რის საშუალებასაც დიფლექსი იძლევა, ეს არის კომპანიებისთვის დანახარჯების შემცირება და სხვადასხვა ფუნქციით და უფრო მოქნილი მიდგომებით ოპერირების შესაძლებლობა. ამასთან, დიფლექსი უზრუნველყოფს პირადი ბაზების კონფიდენციალურობის დაცვას, რადგან ქოლ ცენტრების მომხმარებელ ორგანიზაციებს აქვთ საშუალება არსებული სატელეფონო ბაზა თავიანთ მხარეს დაიტოვონ და ისე მიიღონ მომსახურება აუთსორსზე. ხარისხის კონტროლის მიზნით კი პროცესშივე მოახდინონ ზარების მონიტორინგი და კორექტირება.


ინვესტიციის მოზიდვა და საქართველოს სამედიცინო ჯგუფის დაინტერესება საერთაშორისო პოტენციალის მქონე პროდუქტით მას შემდეგ მოხდა, რაც პანდემიით გამოწვეული კრიზისის დროს ეისითის საწარმოო პროცესში დიფლექსმა წარმატებული და ნაყოფიერი როლი ითამაშა. ციფრულ ხაზზე გადაწყობისას სატელეფონო კვლევების გატანა დიფლექსის პროგრამაში კომპანიისთვის სასიცოცხლო მნიშვნელობის მატარებელი აღმოჩნდა და ამასთან, დანახარჯების შემცირება და ეფექტიანობის გაზრდა გამოიწვია. პარტნიორებისთვის ასევე მნიშვნელოვანი და სანდოობის მაჩვენებელი აღმოჩნდა ინფორმაცია, რომ ციფრული პროდუქტით მსოფლიო ბაზრის უმსხვილესი პროგრამული უზრუნველყოფის კომპანიის წარმომადგენლები QuestionPro და SurveyToGo-ს მენეჯმენტი დაინტერესდა და თანამშრომლობის სურვილი გამოთქვა. 


დიფლექსი განვითარების აქტიურ ფაზას გადის და მსოფლიო არენაზე გასვლისთვის ემზადება. ეისითის პროდუქტების განვითარების და შეთავაზების მრავალწლიანი გამოცდილება და საქართველოს ჯანდაცვის ჯგუფის მასშტაბირების პოტენციალი ორი კომპანიის კოლაბორაციით შექმნილი პროექტის გლობალური ბაზარზე გატანის ამბიციას რეალურს ხდის. მთავარი კონცეფცია Win to Win პრინციპს ემყარება, კომპანიები დიპლექსის გამოყენებით სრულყოფილი მომსახურების გაწევის შესაძლებლობას იღებენ, ხოლო ეისითის შვილობილი კომპანია „დიფლექსი“ - ახალ მომხმარებლებს მთელი მსოფლიოს მასშტაბით.

ბოლო სიახლეები

კვლევისა და საკონსულტაციო კომპანია ეისითი მარკეტერის პლატფორმაზე ახალ ვიდეორუბრიკას იწყებს, რომლის მიზანიც მენეჯმენტ კონსალტინგით დაინტერესებული პროფესიონალების, სფეროს ლიდერების და მენეჯერებისთვის „ახალ ნორმაში“ ბიზნესის ფუნქციონირების და წარმატების მიღწევის გამოცდილების გაზიარება იქნება. კომპანიის სპიკერები ეისითის მიერ შემუშავებული ტრანსფორმაციული მოდელის – სამის ძალის (PWR3) მიხედვით შექმნილი რეალობის და ახალი ნორმის გათვალისწინებით, კომპანიის ლიდერშიფს ფიქრსა და გადაწყვეტილებების მიღებას მუდმივად სამ განზომილებაში – ხედვა, კულტურა, აღსრულება –  სთავაზობენ.


რეალობა, რომელშიც ვცხოვრობთ ეპოქალურია, ამას ცხადყოფს ის ფუნდამენტური ცვლილებები, რომელიც ყველა სფეროს და მიმართულებას შეეხო, ჩვენ ვართ ეკონომიკური და სოციალური რესტრუქტურიზაციის მომსწრენი, ეს კი თავისთავად ნიშნავს ბიზნესისთვის სრული გადაწყობის აუცილებლობას.


როგორ გამოიყურება ახალი ნორმა?


ბიზნესის ნაწილისთვის დღის წესრიგში პირველი პრიორიტეტი გადარჩენა ან პოზიციების შენარჩუნებაა, სხვები ჯერ ისევ ბუნდოვან მომავალს გასცქერიან და ცდილობენ იპოვონ სწორი ორიენტირი; თუმცა ბიზნესის უმრავლესობა ახალი ნორმის მთავარ მოთხოვნას იზიარებს და შეჩერებასა და ერთ კონკრეტულ ამოცანაზე ორიენტირების ნაცვლად, ფეხის აყოლას და სწრაფ გადაწყობას ამჯობინებს. ეს ნიშნავს, სრულად გადახედოთ თქვენს ხედვებსა და მიზნებს, დააკორექტიროთ ან სრულად შეუცვალოთ მათ ვექტორი, ბიზნესს ესმის, რომ მისი წარმატების მთავარი სამიზნე – მომხმარებელი, ახლა უკვე სხვა არის, ისინიც ახალი ნორმის ფარგლებში მოქმედებენ, მათი მოლოდინი სხვა სტანდარტებს ერგება, გადაფასების ეტაპმა მათი საჭიროებების გადაწყობა მოახდინა. მარტივი მაგალითისთვის, თუ აქამდე მომხმარებელი იყო მფლანგველი, რადგანაც ხვალინდელი დღე მას არ აღელვებდა და ზეგინდელი დღე სტაბილურად ეჩვენებოდა, ახლა მომხმარებელი მომავალს სხვაგვარად უყურებს, მან არ იცის იქნება თუ არა „ზეგ“ ისეთივე, როგორც გათვალა, რადგანაც რეალობა თურმე ძალიან ცვალებადია და შესაძლოა, სულაც არ იყოს შენი ან სხვა ადამიანების გავლენის ქვეშ.


ხედვის ტრანსფორმირება


სტაბილურობა, არ ნიშნავს უცვლელობას, ის მხოლოდ მდგრადი განვითარების შედეგია. ციფრულ ერაში სამყარო საოცარი ტემპით იცვლება და ბიზნესს ისღა დარჩენია, რომ  ამ ცვლილებების ტალღას ზევიდან მოექცეს და არა მასში მოჰყვეს.  პანდემიამ ცვლილებების კასკადი კიდევ უფრო ააჩქარა – შეცვალა მომხმარებელი, ემოციური ფონი, სოციალური ყოფა, გადააფასა მათი მიდგომები – ყოველივე ამან ბიზნესის ლანდშაფტის ცვლილება მოიტანა, სადაც კომპანიები ახალი საყრდენ წერტილებს ეძებენ.


დღეს ბიზნესის წარმატება პირდაპირ კავშირშია იმასთან, რამდენად დროულად აღმოაჩენს იგი ტრანსფორმაციის საჭიროებას და რამდენად სწორად წარმართავს ის ამ პროცესს. ტრანსფორმაციის საჭიროების დანახვა და აღიარება, ბიზნესის წარმატების აუცილებელი, მაგრამ არასაკმარისი პირობაა. კომპანიის მმართველი გუნდისთვის მნიშვნელოვანია იმის გააზრება, რომ ტრანსფორმაცია ბევრად დიდია, ვიდრე ცალკეული ნაწილის ცვლილება – ტრანსფორმაცია ნიშნავს სრულ გარდასახვას.


სამუშაო მოდელის განახლება


დისტანციური მუშაობისთვის კომპანიები მალევე გადაეწყვნენ ციფრულ არხებზე, იყენებენ მეტ ტექნოლოგიებს, რომლის საშუალებითაც ადამიანები სახლიდან მუშაობას ახერხებენ, თუმცა ეს დიდი სურათის მხოლოდ ერთი ნაწილია.

დისტანციურად მუშაობის ეფექტურობა ვერ შეფასდება მხოლოდ პროცესების მექანიკური გადატანით მოშორებულ მანძილზე. საჭიროა თავიდან შეიქმნას სრული სამუშაო მოდელი, სტრატეგია უნდა გაითვალოს პროცესში ჩართულ ყველა მხარეზე, გამოიკვეთოს პროცესის საკვანძო მომენტები, მოქმედების არეალი, ურთიერთ თანამშრომლობის გზები და განვითარების პერსპექტივა უკვე ციფრულ კონტექსტში. თუ თქვენ მხოლოდ ერთ კონკრეტულ ნაწილს გააციფრულებთ საწარმოო პროცესში, შეღავათზე მეტად, ამან შესაძლოა თქვენი უფრო მეტი რესურსი და დრო წაიღოს, რადგანაც ამ კონკრეტული ნაწილის უკვე არსებულთან შერწყმა იქნება თქვენი მთავარი ამოცანა და არა განვითარება.


ადამიანების ჩართვა


თუკი რამე ღირებული შეიძლება ვიპოვოთ პანდემიაში, ეს იმის დანახვა და აღიარებაა, რომ ზედმიწევნით გამართული პროცესებიც კი, არ მუშაობს ადამიანების გარეშე, რადგანაც მათ უკან არ დგას ამ პროცესების თანმიმდევრობის, სიმძლავრის და გადაკვეთის შემფასებელი და შემცვლელი. ყველაზე მთავარი კი ის არის, რომ ამ აწყობილ სისტემებს და მოდელებს ადამიანების გარეშე სული აკლიათ, ის მთავარი შემაკავშირებელი და მაცოცხლებელი ძალა, რომელიც კომპანიას ჩამოყალიბებული და შეთანხმებული ხედვით, კონკრეტული ბიზნეს მოდელით და აწყობილი პროცესებით, წარმატების დანიშნულ წერტილთან მიიყვანს და შემდეგ ამ წარმატებას აღნიშნავს.


ახალმა ნორმამ აიძულა სხვადასხვა ზომის და სექტორის წარმომადგენელი კომპანიები იყვნენ მუდმივ მოქმედებაში. გარდასახვის შედეგად ბიზნესებმა ისევ უნდა მიაღწიონ იმ ჰარმონიულ ეტაპს, რომელიც მათთვის იქცევა ახალ ნორმად – სამყარო მომხმარებლის/თანამშრომლის შეცვლილი ქცევით, მენეჯმენტის არასტანდარტული გადაწყვეტებით და სამუშაოს ახალი დიზაინით. ეისითი გთავაზობთ გამოგვყვეთ ახალ ნორმაში ჰარმონიის ძიების გზაზე, სადაც ჩვენი გამოცდილება ყველაზე მოკლე და ეფექტურ გადასასვლელებს გაგიზიარებთ.

03.12.2021

ეისითის ბიზნეს მოდელისა და ორგანიზაციული ტრანსფორმაციის ისტორია


2021 წლის მიწურულს კვლევის და საკონსულტაციო კომპანია ეისითი ასრულებს დიდი ტრანსფორმაციის გარდამტეხ ფაზას. რა ფილოსოფიით იხელმძღვანელეს კომპანიაში, როგორი იყო განვითარების ეტაპები და როგორ მივიდა ის წონასწორობის კონცეფციამდე, ვინ გამოხატავს და როგორ არის განაწილებული ძალთა ბალანსი კომპანიაში, რომელმაც საქართველოში კვლევითი ინდუსტრიის სტანდარტები შექმნა და ახლა აპირებს მენეჯმენტ კონსალტინგის მწვერვალები დაიპყროს, ეისითი აზიარებს წარმატების ისტორიას და თავის კლიენტებს სთავაზობს - კარგი კომპანიიდან დიდებულ კომპანიამდე ნახტომი სწორედ მის მიერ შემუშავებული უნიკალური მოდელით გააკეთონ.


ჩვენ მიჩვეული ვართ, რომ გამორჩეული ლიდერები იშვიათად იბადებიან ან საერთო ფონზე უეცრად ჩნდებიან და ვითარდებიან, როცა ბიზნესზე ვსაუბრობთ, ასეთ ლიდერს და მის გუნდს წარმოვიდგენთ, რომელიც კომპანიის წინსვლას უდგას სათავეში. მისი მამოძრავებელი ძალა კი, რომელიმე ერთია - ის ან ხედავს კომპანიის მომავალს და ამ ხატისკენ ისწრაფვის, ან ორიენტირებულია გუნდზე და წარმატების მიღწევა მისთვის საერთო გამოწვევაა, ან კომპანიის ყოველდღიური შედეგებისთვის მუშაობს და დიდი გამარჯვებების გზას ფრთხილად გადის. ახალი რეალობა გვკარნახობს, რომ ერთი ასეთი ლიდერი საკმარისი აღარ არის, გამოწვევების ფეხდაფეხ სიარული კომპანიას საშუალებას აძლევს დარჩეს ზედაპირზე, მაგრამ მას, ვისაც სურს მაღლა აფრინდეს და ბიზნესის მომავლის სამყაროები აღმოაჩინოს - იმაზე მეტი ბიძგი სჭირდება ვიდრე კარგი ლიდერია, მაგალითისთვის - სამი ძალიან კარგი ლიდერი.


სამი ძალის ბალანსზე კომპანიის თანადამფუძნებელი და ხედვის ლიდი თინათინ რუხაძე რამდენიმე წელია ფიქრობს. ადამიანმა, რომელმაც 19 წლის წინ საკუთარ თავზე აიღო კომპანიის ლიდერობა და მასთან ერთად გაიარა ყველა საფეხური, დარწმუნებულია, რომ იმაზე მეტის შეთავაზება შეუძლია ახალი რეალობისთვის, ვიდრე სტანდარტული მართვის მოდელია. სწორედ ასე გაჩნდა ეისითის ტრანსფორმაციის და ახალი ბიზნეს მოდელის ჩამოყალიბების იდეა, რომელიც წლობით ნაფიქრი და გამოზრდილი - რეალობად 2021 წელს იქცა.


„2002 წლის დეკემბრიდან ცხრა წლის მანძილზე ACT სწრაფად გაიზარდა, თუმცა, გარკვეულ ეტაპზე, 2013-2018 წლებში, კომპანიის ზრდა საგრძნობლად შენელდა. ჩემთვის სტაგნაცია ნიშნავს რეგრესს. ამიტომაც ტრანსფორმაციის საჭიროება დავინახე. ამასთან, მნიშვნელოვანი იყო გადაგვეწყვიტა რა არის დღეს კლიენტისთვის ყველაზე ღირებული. გვაქვს მონაცემი, გვაქვს ინსაითი, არ გვაქვს ხიდი ამ მონაცემებსა და ბიზნეს გადაწყვეტილებებს შორის და მოდი გავხდეთ ჩვენი კლიენტისთვის რეალური მხარდამჭერი - მხარი დავუჭიროთ მას ცოდნაზე დაფუძნებული გადაწყვეტილებები პრაქტიკაში გადაიტანოს“, - აღნიშნავს ეისითის ხედვის ლიდი თინათინ რუხაძე.


სამი ძალის მართვამდე კომპანიამ განვითარების სამი მნიშნელოვანი ეტაპი გაიარა:


თინათინ რუხაძე, ACT-ის ხედვის ლიდი, დამფუძნებელი


პირველი ეტაპი „სწრაფი სვლა“ 2000-იანების დასაწყისში ეისითი საქართველოში კვლევითი სტარტაპი იყო, გამოკვეთილი ამბიციით - არამარტო თავი დაემკვიდრებინა ბიზნესში, არამედ საზოგადოებაში შეექმნა კვლევის სფეროსადმი ნდობა, მისი საჭიროება და მნიშვნელობა ეჩვენებინა მომავალი კლიენტებისთვის. ასეც მოხდა - ეისითიმ ეტაპობრივად განავითარა ყველა ის მიმართულება, რომელიც ამ სფეროში იყო მნიშვნელოვანი. ერთის მხრივ აამუშავა სოციალური კვლევების მიმართულება და დაამყარა ურთიერთობა საერთაშორისო დონორებთან, რომელთაც სურდათ ქვეყანაში მდგრადი ეკონომიკის და სოციალური გარემოს ხელშეწყობა, თანდათან აითვისა გეოგრაფიული არეალი და სანდო პარტნიორის იმიჯი მოიპოვა; ხოლო მეორეს მხრივ - ქართულ ბიზნესში ახალი სიტყვა თქვა, მალევე მოიპოვა ბაზრის ლიდერის და სფეროს ექსპერტის წოდება.


განვითარების ამ ეტაპზე კომპანიას თინათინ რუხაძე ხელმძღვანელობდა, ადამიანი, რომელსაც სტარტაპისათვის საჭირო შემართება, სფეროს პოტენციალის წინმსწრებად ხედვის, შეფასების და გეზისკენ სწრაფი სვლის უნარი აქვს.


თინათინი იხსენებს: „რთული იყო ქართულ ბაზარზე კვლევების, როგორც ბიზნესის განვითარების აუცილებელი პირობის დამკვიდრება, ბიზნესისათვის საჭირო მუხტის მიცემა, რომ ისინი ყოფილიყვნენ პროაქტიულნი და კვლევების საჭიროება ერწმუნათ; დიდი ძალისხმევა დაიხარჯა მათი ნდობის მოპოვებისთვის და იმ აღიარებისთვის, რომ საქართველოში მიღებული და დამუშავებული ინფორმაცია და მასზე დაყრდნობით გაცემული რეკომენდაციები ისეთივე ღირებული იქნებოდა მათთვის, როგორც საერთაშორისო კომპანიის მიერ მიწოდებული“.


რუსუდან თელია, ACT-ის ორგანიზაციული კულტურის ლიდი, დამფუძნებელი

განვითარების მეორე ეტაპი - „ზრდა“ კომპანიისთვის ძირითადი კაპიტალის - საჭირო და კომპეტენტური ადამიანების გამოცდილების კონკრეტულ ექსპერტიზაში აკუმულირების და ლიდერშიფის გაძლიერების წლები იყო. ადგილობრივი ბაზრის ლიდერობის პარალელურად გაჩნდა საერთაშორისო ასპარეზზე გასვლის ამბიცია, რამაც კომპანიაში მმართველი გუნდის წარმომადგენლობის და ექსპერტიზათა მრავალფეროვნების გაძლიერების საჭიროება მოიტანა. ეისითის ხელმძღვანელობა კომპანიის თანადამფუძნებელმა რუსუდან თელიამ ჩაიბარა, რომელმაც სწრაფად განვითარებული, ამბიციური და მზარდი კომპანიის წარმატების ვექტორი შიგნიდანაც მომართა. კომპანიის დაფუძნებიდან დღემდე, ძალიან ბევრ პოზიციაზე იმუშავა - იყო ანალიტიკის დეპარტამენტის ხელმძღვანელი, ოპერაციული დირექტორი, სოციალური კვლევების მიმართულების ხელმძღვანელი, თუმცა ორგანიზაციული კულტურა, ადამიანები და მათი განვითარება ყველა პოზიციაზე თანაბრად მნიშვნელოვნად მიაჩნდა.


ახალმა მმართველმა ცენტრალიზებული სტრუქტურის დეცენტრალიზაციის პირველი ეტაპი და კომპანიაში შუა რგოლის გაძლიერების პროცესი დაიწყო. რუსუდან თელია არის ადამიანი, ვისთვისაც ადამიანებზე ზრუნვა და მათი მოტივაცია თანდაყოლილი უნარია და მას როგორც მენეჯერს ამის გამომუშავება არ დასჭირვებია. კომპანიის მეორე აღმასრულებელი დირექტორი ჯერ კიდევ წლების წინ მიხვდა: 



„კომპანიაში ერთიანი სულისკვეთების შექმნა და მართვა ვარსკვლავური შედეგების მიღწევაში ერთ-ერთი გადამწყვეტი ძალაა“, დღეს ის ეისითის ორგანიზაციული კულტურის ლიდია და სწორედ ამ კუთხით აძლიერებს კომპანიას.


„ახალი ხედვა დაგვეხმარა გაგვეაზრებინა ის თუ როგორი ორგანიზაციული კულტურა და ლიდერშიფი სჭირდება დღეს კომპანიას. ზრდა და გლობალიზაცია შეუძლებელია გუნდური ლიდერშიფის გაძლიერების, მოქნილობისა და მართვის დეცენტრალიზაციის, ინოვაციური აზროვნებისა და მიდგომების გარეშე. სწორედ ამიტომაც ჩვენ საბაზისო ფასეულობებს, რომელიც სიყვარული და მხარდაჭერა, მუდმივი განვითარება და ეფექტიანობაა, შემოქმედებითობაც დაემატა. შექმნა რაღაც ახალი და ადაპტირდე სწრაფად ცვალებად სამყაროში მხოლოდ შემოქმედებითი აზროვნებით და მიდგომებით არის შესაძლებელი“, - აღნიშნავს რუსუდან თელია.


მესამე ეტაპი კომპანიაში „ექვილიბრიუმია“ - ძალთა ბალანსამდე მისვლის და დამკვიდრების ეტაპი. 19 წლიანი გამოცდილება და კომპანიის მიერ განვლილი გზა ლიდერშიფმა კონკრეტულ სამოქმედო მოდელში მოაქცია, რომლის მიხედვითაც გაზომვადი ეფექტი უნდა ეხმიანებოდეს კომპანიის ხედვას, ასე იქმნება დასამახსოვრებელი წარმატება კომპანიისთვის და ასე იქმნება საზოგადოებრივი სიკეთე, რომლისთვისაც აღწევს წარმატებას ეს კომპანია; შესაბამისად, ასე ქმნის ტრიადას ხედვა და აღსრულება კომპანიის კულტურასთან, რომლის სახელითაც ემსახურებიან ადამიანები აღნიშნულ იდეას.


ერთი წლის წინ კომპანიაში დიდი ტრანსფორმაციისთვის ქმედითი ნაბიჯები გადაიდგა. იმისთვის, რომ ახალი რეალობა ეისითისთვის ყოფილიყო ახალი ნორმა, სადაც გამოწვევებზე რეაგირებენ პროაქტიულად, კომპანიამ შიგნიდან დაიწყო შეცვლა. მმართველი ვერტიკალი ჰორიზონტზე გაიშალა, კომპანიის სტრუქტურა გახდა ქსელური, სადაც არსებობენ გუნდები და პროექტულად მოაზროვნე ადამიანები.


კომპანიის აღმასრულებელ დირექტორად შეირჩა ადამიანი, რომელიც ეისითის ისტორიას თავის თავში ატარებს და მაგალითია, თუ როგორ შეიძლება მიაღწიო წარმატებას ყველა საფეხურის გავლით. ნატალია კვიწინაშვილი კომპანიაში 18 წლის წინ ინტერვიუერად მოვიდა, ის მომსწრე იყო კომპანიის ყველა გარდამტეხი პერიოდის და გადაწყვეტილების და პროფესიულ ზრდასთან ერთად, 2010 წელს კომპანიის პარტნიორი გახდა. 



ნატალია კვიწინაშვილი, ACT-ის აღსრულების ლიდი, პარტნიორი


მისი ხელმძღვანელობით კომპანიის აქამდე არსებულმა მთავარმა მიმართულებამ - კვლევამ კონკურენტულ ბაზარზე სანდო, ღირებული და ხშირ შემთხვევაში ერთადერთი არჩევანის იმიჯი დაიმკვიდრა. ნატალიასთვის შედეგების მიღწევა პირადი ისტორიაა, მან ზუსტად იცის რა უნდა გაკეთდეს და როგორ უნდა დაიგეგმოს თითოეული ნაბიჯი იმისთვის, რომ კომპანია მთავარ მიზანთან სწრაფად მივიდეს და შესაბამისმა პროცესებმა ადამიანების ჩართულობა და სამუშაო გაამარტივოს.


„ახლა ვართ იმ ეტაპზე, როდესაც ხედვა ჩამოყალიბებულია, ვიცით ზუსტად, საით მივდივართ და რა შედეგებს გვინდა მივაღწიოთ. მიმაჩნია, რომ ყველაზე თამამი ოცნება მაშინ სრულდება, როცა ის ამოცანებად გარდაიქმნება, პრიორიტეტები სწორად დალაგდება და რესურსები ადეკვატურად შეფასდება. დღევანდელ ვუკა სამყაროში საუკეთესო შედეგი თავის თავში სწრაფ შედეგსაც გულისხმობს, რისთვისაც მნიშვნელოვანია ისეთი ციფრული სისტემების შექმნა, რომელიც იქნება მარტივი, მოქნილი და მოგვცემს კომპლექსური ანალიზის შესაძლებლობას“, - საუბარში აღნიშნავს ნატალია კვიწინაშვილი.


ტრანსფორმაციამ ეისითის განვითარების სამი ეტაპი გააერთიანა, დღეს კომპანიას ორი ყოფილი აღმასრულებელი დირექტორი თინათინ რუხაძე და რუსუდან თელია და ამჟამინდელი CEO - ნატალია კვიწინაშვილი ხელმძღვანელობენ.


სამი მართველის ეს სამი როლი და ხედვის რაკურსი ეისითის ბიზნეს მოდელში და სამუშაო მიდგომაში აისახა. კომპანიამ შეიმუშავა ორგანიზაციის ტრანსფორმაციის და მართვის უნიკალური მოდელი „სამის ძალა“ (PWR3), რომელიც პირველი სწორედ თავის თავზე გამოსცადა. ეისითის ფილოსოფიით კომპანიის განვითარებისა და წარმატების სამ მთავარი ძალა აერთიანებს ხედვას, კულტურას და აღსრულებას. მოდელი ორგანიზაციის ლიდერშიფს ფიქრსა და გადაწყვეტილებების მიღებას მუდმივად ამ სამ განზომილებაში სთავაზობს. მოდელის ავტორებს სწამთ, რომ მხოლოდ ის გადაწყვეტილებებია საუკეთესო შედეგის მომტანი, რომელიც 1) ემსახურება კომპანიის ხედვასა და მთავარ მიზნებს, ამავე დროს 2) თანხვედრაშია კომპანიის ფასეულობებთან და ითვალისწინებს თანამშრომელთა ინტერესებს, და 3) რომლის აღსრულების რესურსიც კომპანიაში რეალურად არსებობს. ამასთან, PWR3 არამხოლოდ ორგანიზაციის ტრანსფორმაციის, არამედ მისი ეფექტური მართვის მოდელიცაა, რომელიც კომპანიის მენეჯმენტს ეხმარება თანმიმდევრული და ეფექტური გადაწყვეტილებების მიღებაში და მდგრად განვითარებას უზრუნველყოფს.


ეისითის მოდელი უნიკალურია, რადგან მასში ორგანიზაციის ხედვა და ორგანიზაციის კულტურა თავისი წონით გათანაბრებულია აღსრულების მნიშვნელოვნებასთან. შესაბამისად, შეთავაზებული მიდგომები და მექანიზმები ორგანიზაციის ტრანსფორმაციის პროცესში სამივე დომეინზე თანაბარ ფოკუსს ითვალისწინებს.


„კომპანიის მაგალითზე ეს ნიშნავს, რომ ეისითიში ყველა მნიშვნელოვანი გადაწყვეტილება სამივე რაკურსით განიხილება და მხოლოდ მას შემდეგ ფორმდება, რაც აღნიშნული სამი პოლუსის ცენტრში მოექცევა. ეს არ არის მარტივი პროცესი, ზოგ შემთხვევაში ეს გულისხმობს კომპრომისებს და ხანგრძლივ მუშაობას სწორი არჩევანისთვის, თუმცა მოდელის მთავარი ხიბლი გრძელვადიან და მდგრად შედეგშია“, - ეისითის სამი მმართველი ძალა დარწმუნებულია, რომ გადაწყვეტილება, რომელიც ყველა კუთხიდან შეფასდა ღირებულია და საუკეთესო შედეგს მოიტანს.


ტრანსფორმაციის შედეგად ეისითიმ ზრდის ახალი ხედვაც დასახა, მისი კლიენტები მომავლის ლიდერები არიან, რომლებიც ყოველდღიურად ცდილობენ საკუთარი თავი და სამყარო უკეთესობისკენ შეცვალონ: შექმნან უკეთესი პროდუქტი თუ სერვისი, რომელიც ადამიანების მნიშვნელოვან საჭიროებებს დააკმაყოფილებს; ებრძოლონ სიღარიბეს, უზრუნველყონ სოციალური თანასწორობა და თავისუფლება, შესთავაზონ მათ უკეთესი არჩევანი. კომპანია თავის მისიას სწორედ ამ სასიკეთო ცვლილებების ძალის მიცემაში ხედავს, სადაც მონაცემები, მხოლოდ ერთიანი სურათის შექმნისთვის აუცილებელი საყრდენია, ამიტომაც ეისითი აღარ არის მარტო კვლევითი კომპანია, ის კვლევისა და საკონსულტაციო კომპანიად პოზიციონირდება.


ეისითი კონსალტინგს მრჩევლის პერსპექტივიდან არ განიხილავს. ეს უფრო თანამუშაობის პროცესია, სადაც ეისითი ფასილიტატორის როლს ასრულებს - ის პროცესის მხარდამჭერი ხდება. სამუშაო პროცესში მისი მთავარი პასუხისმგებლობაა კომპანიის ტრანსფორმაციულ გუნდს დაეხმაროს ეფექტიანი გადაწყვეტილებების მიღებასა და ცვლილებების აღსრულებაში, ეფექტიანობის მთავარი საზომი კი, კომპანიის წარმატების მიღწევის მაჩვენებლებია.


„ჩვენ არ ვართ გმირები, რომლებმაც ბიზნესი უნდა გადაარჩინონ, - აღნიშნავს თინათინ რუხაძე. - ჩვენთვის ბიზნესია გმირი - ის ცდილობს, საკუთარი თანამშრომლების სამუშაო პირობები გააუმჯობესოს; ის ცდილობს, უკეთესი ქვეყნის შექმნის პროცესში საკუთარი როლი დაინახოს და შეასრულოს. ჩვენ ამ მიზნების მიღწევაში ვუჭერთ მხარს“.


კომპანია ერთ წელიწადში არსებობის 20 წელს დაითვლის, 2022 წლისთვის ეისითი ტრანსფორმაციის ძირითად ფაზას დაასრულებს და ახალ ნორმაში ფუნქციონირების უფრო მაღალ საფეხურზე გადავა, სადაც მის მიერ აპრობირებული ტრანსფორმაციული მოდელი, როგორც ეისითის ძირითადი პროდუქტი, კლიენტისთვის შეთავაზებული ღირებული ინსტრუმენტი გახდება. უნიკალური შეჭიდულობის ეფექტიანობის ძალა დაარწმუნებს მათ, რომ სამყარო ძალთა ბალანსზე დგას, რომ აღარ არის საკმარისი ერთი ლიდერი, რომელიც ყველაფერს განსაზღვრავს და კომპანიებს დიდ ნახტომში მაგალითის მიმცემად მოევლინება, გათვლის ყველაფერს და დააზღვევს ყველას. ახალი რეალობა გვკარნახობს, რომ წარმატების ფორმულა განაწილებულ პასუხისმგებლობაშია, მოდით მივყვეთ ეისითის ფილოსოფიას - ერთად გავაკეთოთ ნახტომი, ყველამ ერთმანეთი დავაზღვიოთ და ერთმანეთი ფრენაში გავაძლიეროთ, რადგანაც შედეგი უფრო თვალსაჩინო და დასამახსოვრებელი იყოს, მოდით ერთად დავწეროთ ჩვენი კომპანიების ისტორია, რადგანაც მე, შენ და ჩვენ ვართ ყველაზე მნიშვნელოვანი, თითოეული ჩვენგანის მოქმედებაში ყოფნა უზრუნველყოფს ერთიანი მექანიზმის მუშაობას და ჩვენ მხოლოდ ერთად შეგვიძლია ავწიოთ წარმატების სიმძიმე და აღფრთოვანება.


11.11.2021

5 ნოემბერს, ეისითის განვითარების კონსალტინგის მიმართულების კვლევითი პროექტის „სამართლებრივი ბაზრის კვლევა საქართველოში“ პრეზენტაცია ჩატარდა. პროექტი აღმოსავლეთ-დასავლეთის მართვის ინსტიტუტის (EWMI) დაკვეთით განხორციელდა.


პრეზენტაციაზე ეისითის წამყვანმა კონსულტანტმა კესო ესებუამ თვისებრივი კვლევის შედეგების ანგარიში წარადგინა, რომლშიც ასახულია თუ რა მოთხოვნებია სამართლებრივ ბაზარზე საქართველოში და რამდენად აკმაყოფილებს იურისტთა მომზადების არსებული დონე აღნიშნულ მოთხოვნებს.


როგორც კვლევის შედეგები მოწმობს, სამართლებრივ შრომით ბაზარზე ძირითადი მოთხოვნა პრაქტიკული და პროფესიული უნარ‐ჩვევების, კრიტიკულად მოაზროვნე და სხვადასხვა რბილი უნარის (soft skills) მქონე ახალბედა იურისტებზეა. ამასთან, საჯარო სექტორისთვის ნაკლებად, მაგრამ კერძო სექტორისთვის მნიშვნელოვანია ინგლისური ენის ცოდნაც. ეს არის ის ძირითადი მოთხოვნები, რომელთა დაკმაყოფილებაც ახალგაზრდა იურისტებს ყველაზე მეტად უჭირთ, თუმცა, მთავარი გამოწვევა მაინც თეორიული ცოდნის პრაქტიკაში ტრანზიციას უკავშირდება.


კვლევის ანგარიში: სამართლებრივი ბაზრის კვლევა საქართველოში


 

05.11.2021
close